పాడ్‌కాస్ట్ ఆడియో సంచికలు

నిజంగా ఇది ఎంతో అద్భుతమైన పరిణామం శ్రుతి గారూ! ముఖ్యంగా మన యువత అంతర్గత శాంతి వైపు అడుగులు వేయడం శుభసూచకం. పాఠశాలలు, కళాశాలలు మరియు సమాజంలో హార్ట్‌ఫుల్‌నెస్ అందిస్తున్న స్కూల్ కనెక్ట్, కాలేజ్ కనెక్ట్, కమ్యూనిటీ కనెక్ట్ కార్యక్రమాలు విద్యార్థులలో విశేషమైన పరివర్తనను తెస్తున్నాయి. ఈ నెలలో జరిగిన ముఖ్యమైన విశేషాలను జిల్లాల వారీగా తెలుసుకుందాం.

అవును శ్రుతి, అలాగే నెల్లూరు జిల్లాలో కూడా విద్యార్థులకు విస్తృతంగా ధ్యాన తరగతులు జరిగాయి. నారాయణ జూనియర్ కళాశాలలో 685 మంది విద్యార్థులు, ఆర్.ఎస్.ఆర్ ఇంజనీరింగ్ కళాశాలలో 407 మంది విద్యార్థులు హార్ట్‌ఫుల్‌నెస్ హెల్ప్ మరియు ఫాలో అప్ సెషన్లలో పాల్గొని మనశ్శాంతిని అనుభవించారు. కావలి, గూడూరు ప్రాంతాల్లోని ప్రభుత్వ పాఠశాలల్లో విద్యార్థులకు ధ్యానం మరియు సర్టిఫికెట్ల పంపిణీ జరిగింది.

విశాఖపట్నం జిల్లాలో ఆంధ్ర విశ్వవిద్యాలయంలోని ఎకనామిక్స్, సైకాలజీ, జువాలజీ, న్యూక్లియర్ ఫిజిక్స్ వంటి వివిధ విభాగాల విద్యార్థులకు రిలాక్సేషన్, వ్యాసరచన పోటీలు నిర్వహించారు. నగరంలోని 13 హార్ట్‌ఫుల్‌నెస్ కేంద్రాలలో ఏకకాలంలో 500 మంది అభ్యాసకులతో నషాముక్తి ప్రతిజ్ఞ చేయించడం విశేషం.

ప్రకాశం జిల్లా ఒంగోలులో విద్యార్థులతో పాటు ఆర్పీఎఫ్ కార్యాలయ సిబ్బందికి ప్రత్యేక ధ్యాన శిక్షణ నిర్వహించారు. నంద్యాల జిల్లా ప్యాపిలి షెఫర్డ్ కేంద్రంలో శిక్షణ పొందుతున్న సహాయకులకు మూడు రోజుల శిక్షణ లభించింది. అల్లూరి సీతారామరాజు జిల్లా అరకు లోయలో విద్యార్థులకు ధ్యానోత్సవ్ నిర్వహించగా, కడప జిల్లా సుండుపల్లిలో పూజ్య దాజీ గారి జన్మదినం సందర్భంగా అనంత అరణ్య కార్యక్రమంలో భాగంగా మొక్కలు నాటే బృహత్తర కార్యాన్ని చేపట్టారు.

ఇంతటి స్ఫూర్తిదాయక కథనంతో మన శ్రోతలను కలవడం ఎంతో సంతోషంగా ఉంది. ప్రియమైన శ్రోతలారా! ప్రపంచాన్ని జయించాలంటే ముందు మనల్ని మనం జయించాలి. మనల్ని మనం జయించాలంటే మన మనస్సు మన ఆధీనంలో ఉండాలి. ప్రతిరోజూ చేసే ధ్యానం మిమ్మల్ని మీకు కొత్తగా పరిచయం చేయడమే కాకుండా, మీ మనసుకి అనిర్వచనీయమైన ప్రశాంతతను ఇస్తుంది. మీరు మీ హృదయాన్ని, ఆ పరమాత్మ యొక్క దివ్యమైన ప్రేమతో, మన పూజ్య గురువుల హృదయంతో నిరంతరం అనుసంధానం చేసుకుంటూ... ఆ ఆధ్యాత్మిక ప్రకాశంలో ఆనందమయ జీవితం గడపాలని మనసారా ఆశిస్తున్నాము. మళ్లీ వచ్చే నెల మరింత సమాచారంతో కలుద్దాం. సర్వే జనాః సుఖినో భవంతు!